Triawd arloesol o Gaerfyrddin sy’n adnabyddus am eu cyfuniad unigryw o ôl-bync, pop amgen ac indi arbrofol. Maent yn llais blaengar ym myd cerddoriaeth amgen sy'n hyrwyddo’r Gymraeg ar lwyfannau rhyngwladol
Wedi’u ffurfio yn 2015 gan Hollie Singer (llais, gitâr), Gwenllian Anthony (bas, allweddellau), a Heledd Owen (drymiau), mae Adwaith wedi teithio’n helaeth ar draws y DU, Ewrop, a gogledd America, ac wedi perfformio mewn gwyliau mawr gan gynnwys Glastonbury a SXSW yn yr Unol Daleithiau.
Enwyd eu trac 'ETO' yn gân Gymraeg y degawd, ac fe’u cydnabuwyd yn ddiweddar fel act Gymraeg mwyaf dylanwadol y deng mlynedd diwethaf.
Derbyniodd eu halbwm cyntaf 'Melyn' (2018) ganmoliaeth eang a chafodd ei enwi’n enillydd y Wobr Gerddoriaeth Gymreig. Yn 2022, dilynwyd hyn gyda 'Bato Mato', albwm beiddgar wedi’i ysbrydoli gan daith drawsnewidiol i'r grŵp ar reilffordd Draws-Siberia i berfformio yn Ulan-Ude, a nhw oedd y band cyntaf i ennill y wobr hon ddwywaith.
Yn 2025, rhyddhaodd Adwaith 'Solas', albwm dwbl uchelgeisiol 23 trac a ysgrifennwyd ac a recordiwyd ar draws Cymru, Lisbon, ac Ynysoedd Allanol yr Alban. Yn llawn emosiwn ac archwiliad sain, dyma’u datganiad cerddorol mwyaf pwerus hyd yma