Ar fore cyntaf yr Eisteddfod yn Sir Fynwy a’r Cyffiniau, mae’r neges yn glir – mae croeso mawr i bawb yn Nolydd y Castell, Y Fenni.
Gyda thros fil o weithgareddau yn cael eu cynnal ar hyd a lled y Maes drwy gydol yr wythnos, y gobaith yw y bydd miloedd o ymwelwyr yn tyrru i’r Fenni. Meddai Elfed Roberts, Prif Weithredwr yr Eisteddfod, “Mae’r Maes eleni mewn lleoliad arbennig, o fewn munudau i ganol y dref, ac yn hynod o gyfleus. Rydym yn gobeithio y bydd hyn yn annog pobl i ddod draw i weld beth sydd ar y Maes.
“Mae’r ddwy flynedd ddiwethaf wedi bod yn gyfnod hapus a chynhyrchiol iawn i ni fel Eisteddfod wrth weithio gyda gwirfoddolwyr lleol a Chyngor Sir Fynwy. Mae’r gefnogaeth wedi bod yn ardderchog ac wrth i’r Maes agor ei giatiau'r bore 'ma, mae’n bleser diolch o waelod calon a thalu teyrnged i bawb a fu ynghlwm efo’r gwaith.
“Eisteddfod pobl Sir Fynwy a’r Cyffiniau yw hon, ac mae’r trigolion wedi disgwyl yn ddigon hir i ni ymweld â’r ardal – dros gan mlynedd! Mae’r giatiau ar agor a’r croeso yn gynnes, felly dewch draw i’n gweld yn Nolydd y Castell.”
Mae gwasanaeth cyfieithu ar gael yn rhad ac am ddim yn y Pafiliwn ac mewn sesiynau ar draws y Maes yn ystod yr wythnos. Ewch i’r caban cyfieithu o flaen y Pafiliwn am ragor o wybodaeth ac offer.
Os ydych yn dod atom am y tro cyntaf, beth am ymuno ag un o’n Teithiau Tywys? Mae’r daith yn gadael y ganolfan Ymwelwyr (prif fynedfa) am 11.00 a 14.00 bob dydd. Mae’r daith yn addas ar gyfer pawb.